ಸ್ಫೂರ್ತಿಯ ಮಾತುಗಳು : ಸಂಚಿಕೆ - 222

ಸ್ಫೂರ್ತಿಯ ಮಾತುಗಳು : ಸಂಚಿಕೆ - 222

ಲೇಖಕರು : ರಮೇಶ ಎಂ. ಬಾಯಾರು 

ರಾಜ್ಯಪ್ರಶಸ್ತಿ ಪುರಸ್ಕೃತ ನಿವೃತ್ತ ಅಧ್ಯಾಪಕರು

ಬಂಟ್ವಾಳ ತಾಲೂಕು , ದಕ್ಷಿಣ ಕನ್ನಡ ಜಿಲ್ಲೆ

ಮೊಬೈಲ್ ಸಂಖ್ಯೆ : +91 94486 26093

rameshbayar@gmail.com 

                    

ಸನಾತನ ಸಾಹಿತ್ಯಗಳಲ್ಲಿ ವೇದಗಳಿಗೆ ಅಗ್ರಸ್ಥಾನ. ವೇದಗಳಲ್ಲಿ ನಾಲ್ಕು ವಿಧಗಳಿವೆ. ಋಗ್ವೇದ, ಸಾಮವೇದ, ಯಜುರ್ವೇದ ಮತ್ತು ಅಥರ್ವವೇದ. ಋಗ್ವೇದವು ಅತ್ಯಂತ ಪುರಾತನ ರೂಪ. ಸಾಮವೇದವು ಗಾಯನದ ಸ್ವರೂಪ ಪಡೆದಿದೆ. ಭಗವಂತನ ಆರಾಧನೆ ಮತ್ತು ಪ್ರಾರ್ಥನೆ ವಿಧಿಗಳು ಯಜುರ್ವೇದದಲ್ಲಿದೆ. ಇಂದ್ರಜಾಲ ಅಥವಾ ಮೋಡಿಗಳ ಬಗ್ಗೆ ವಿವರಿಸುವ ಸಾಮವೇದ ನಾಲ್ಕನೆಯ ಪ್ರಕಾರದ ವೇದ. ವೇದಗಳಲ್ಲಿ ವೇದಾಂಗಗಳು ಮತ್ತು ಉಪವೇದಗಳಿವೆ. ಪ್ರತಿ ವೇದವು ನಾಲ್ಕು ಉಪವಿಭಾಗಗಳನ್ನು ಹೊಂದಿದೆ.

1. ಸಂಹಿತೆಗಳು (ಮಂತ್ರಗಳು ಮತ್ತು ಆಶೀರ್ವಾದಗಳು)

2. ಅರಣ್ಯಕಗಳು (ಆಚರಣೆಗಳು, ಸಮಾರಂಭಗಳು, ಯಜ್ಞಗಳು ಮತ್ತು ಸಾಂಕೇತಿಕ-ಯಜ್ಞಗಳ ಪಠ್ಯ)

3. ಬ್ರಾಹ್ಮಣಗಳು (ಆಚರಣೆಗಳು, ಸಮಾರಂಭಗಳು ಮತ್ತು ಯಜ್ಞಗಳ ವ್ಯಾಖ್ಯಾನಗಳು)

4. ಉಪನಿಷತ್ತುಗಳು (ಧ್ಯಾನವನ್ನು ಚರ್ಚಿಸುವ ಪಠ್ಯಗಳು, ತತ್ವಶಾಸ್ತ್ರ ಮತ್ತು ಆಧ್ಯಾತ್ಮಿಕ ಜ್ಞಾನ). 

ಕೆಲವು ವಿದ್ವಾಂಸರು ಉಪಾಸನಗಳು(ಪೂಜೆ) ಎಂಬ ಐದನೇ ವರ್ಗವನ್ನು ಸೇರಿಸುತ್ತಾರೆ.  

ಕಾಲಮಾನ:

ಬ್ರಹ್ಮನ ಒಂದು ದಿನದ ಪ್ರಮಾಣ ನಮಗೆ ಕಲ್ಪ. ಕಲ್ಪವು ಕಾಲಚಕ್ರ. ಮನುಷ್ಯಮಾನದಿಂದ ಒಂದು ತಿಂಗಳಾಗುವ ಕಾಲ ಪಿತೃದೇವತೆಗಳ ಮಾನದಲ್ಲಿ ಒಂದು ದಿನ. ಮನುಷ್ಯಮಾನದ ೧೦೦೦ ಚತುರ್ಯುಗಗಳು (ಮಹಾಯುಗ) ಅಥವಾ ದೇವಮಾನದ ೧೦೦೦ ಯುಗಗಳು ಚತುರ್ಮುಖ ಬ್ರಹ್ಮನಿಗೆ ಒಂದು ಹಗಲು. ಚೈತ್ರ ಶುಕ್ಲ ಪಾಡ್ಯ ಭಾನುವಾರ ಪ್ರಥಮ ಕಲ್ಪ ಪ್ರಾರಂಭವಾದ ದಿನ. ಅಂದಿನಿಂದ ಬ್ರಹ್ಮ ಸೃಷ್ಟಿಗೆ ಪ್ರಾರಂಭಿಸಿದ. ಒಂದೊಂದು ಕಲ್ಪದಲ್ಲಿ ಬೇರೆ ಬೇರೆ ಮನ್ವಂತರಗಳಿವೆ.

೮,೬೪,೦೦,೦೦,೦೦೦ ಸೌರವರ್ಷಗಳು ಕಳೆದರೆ ಬ್ರಹ್ಮನ ಒಂದು ದಿನವಾಗುತ್ತದೆ. ಬ್ರಹ್ಮನ ಒಂದೊಂದು ದಿನಕ್ಕೆ ಒಂದೊಂದು ಹೆಸರಿದೆ. ಅವುಗಳೆಂದರೆ ಶ್ವೇತವರಾಹ, ನೀಲಲೋಹಿತ, ವಾಸುದೇವ, ರಥಂತರ, ರೌರವ, ಪ್ರಾಣ, ಬೃಹತ್, ಕಂದರ್ಪ , ಸದ್ಯ, ಈಶಾನ, ವ್ಯಾನ, ಸಾರಸ್ವತ, ಉದಾನ, ಗಾರುಡ, ಕೌರ್ಮ , ನಾರಸಿಂಹ, ಸಮಾನ, ಆಗ್ನೇಯ, ಸೋಮ, ಮಾನವ, ತತ್ಪುರುಷ , ವೈಕುಂಠ, ಲಕ್ಷ್ಮಿ, ಸಾವಿತ್ರಿ , ಘೋರ, ವಾರಾಹ, ವೈರಾಜ , ಗೌರಿ , ಮಾಹೇಶ್ವರ ಮತ್ತು ಪಿತೃ. ಇವುಗಳಲ್ಲಿ ಮೊದಲ ಹದಿನೈದು ಕಲ್ಪಗಳಿಗೆ ಶುಕ್ಲ ಪಕ್ಷವೆಂದು, ಉಳಿದ ಹದಿನೈದು ಕಲ್ಪಗಳಿಗೆ ಕೃಷ್ಣಪಕ್ಷವೆಂದು ಹೆಸರು. ಈ ಒಟ್ಟು ಮೂವತ್ತು ಕಲ್ಪಗಳು ಕಳೆದರೆ ಬ್ರಹ್ಮನಿಗೆ ಒಂದು ತಿಂಗಳು. ಈ ವಿಧವಾದ ಹನ್ನೆರಡು ತಿಂಗಳು ಕಳೆದರೆ ಒಂದು ವರ್ಷ. ಬ್ರಹ್ಮನಿಗೆ ಈ ಪ್ರಮಾಣದ ನೂರು ವರ್ಷಗಳು ಆಯಸ್ಸು. ಪ್ರಕೃತ ನಡೆಯುತ್ತಿರುವುದು ಬ್ರಹ್ಮನ ಐವತ್ತೊಂದನೆಯ ವರ್ಷದ ದ್ವಿತೀಯ ಪರಾರ್ಧದ ಪ್ರಾರಂಭದಲ್ಲಿ ಮೊದಲನೆಯದಾದ ಶ್ವೇತವರಾಹ ಕಲ್ಪ.

ನಾಲ್ಕು ಯುಗಗಳನ್ನು ಒಟ್ಟಾಗಿ ಮಹಾಯುಗ ಎನ್ನುವರು. ಎಲ್ಲಾ ಕಾಲಮಾನಗಳ ಹೆಸರು ವಾರದ ಹೆಸರಿನಂತೆ ನಿರ್ಧಿಷ್ಠ ಅವಧಿಗೆ ಸಂಬಂಧಿಸಿದೆ. ಇವುಗಳು ಪುನರಾವರ್ತನೆಯಾಗುತ್ತಾ ಬಳಕೆಯಾಗುತ್ತವೆ.

ಯುಗಗಳು

ಸತ್ಯಯುಗ = 17ಲಕ್ಷ 28ಸಾವಿರ ವರ್ಷಗಳು

ತ್ರೇತಾಯುಗ = 12ಲಕ್ಷ 96 ಸಾವಿರ ವರ್ಷಗಳು

ದ್ವಾಪರಯುಗ = ಎಂಟು ಲಕ್ಷ 64 ಸಾವಿರ ವರ್ಷ

ಕಲಿಯುಗ = 4 ಲಕ್ಷ 32 ಸಾವಿರ ವರ್ಷಗಳು

ಆ. ಮಹಾಯುಗ

ಮಹಾಯುಗ (ಚತುರ್ಯುಗ) = ನಾಲ್ಕು ಯುಗಗಳು ಸೇರಿ 43ಲಕ್ಷ 20 ಸಾವಿರ ವರ್ಷಗಳು.

ಮನ್ವಂತರ

ಮನ್ವಂತರ : 71 ಮಹಾಯುಗಗಳು

ಕಲ್ಪ

ಕಲ್ಪ : 14 ಮನ್ವಂತರ ಅಥವಾ 1000 ಮಹಾಯುಗಗಳು- 4 ಅಬ್ದ 32ಕೋಟಿ ವರ್ಷಗಳು (4320000000)

ಬ್ರಹ್ಮದೇವರ ಜೀವನ : 100 ವರ್ಷಗಳು

ಬ್ರಹ್ಮದೇವರ ಜೀವನದ 50 ವರ್ಷಗಳು ಮಹಾ ವಿಷ್ಣುವಿನ ಒಂದು ಕ್ಷಣ

ವಿಷ್ಣುವಿನ 12 ಲಕ್ಷ ಕ್ಷಣಗಳು - ಮಹೇಶ್ವರನ ಅರ್ಧ ಸಮಯ

ಇದಾದ ನಂತರ ನೂತನ ಬ್ರಹ್ಮ ವಿಷ್ಣು ಮತ್ತು ಮಹೇಶ್ವರರ ನಿರ್ಮಾಣವಾಗುತ್ತದೆ.

ಈಗ ಬ್ರಹ್ಮದೇವರ ಐವತ್ತು ವರ್ಷಗಳು ಪೂರ್ಣವಾಗಿವೆ ಅಂದರೆ ಒಂದು ಪರಾರ್ಧ ಮುಕ್ತಾಯಗೊಂಡಿದೆ (15,55,20,00,00,00,000 ವರ್ಷ)

ಈಗ ಐವತ್ತತೊಂದನೇ ವರ್ಷದ ಮೊದಲನೇ ದಿನ ಅಂದರೆ ಶ್ವೇತವರಾಹ ಕಲ್ಪ ಪ್ರಾರಂಭವಾಗಿದೆ. ಈ ಶ್ವೇತವರಾಹ ಕಲ್ಪದ ಆರು ಮನ್ವಂತರಗಳು ಕಳೆದು, ಏಳನೇ ಮನ್ವಂತರ (ವೈವಸ್ವತ) ನಡೆಯುತ್ತಿದೆ.

ವೈವಸ್ವತ ಮನ್ವಂತರದಲ್ಲಿ ಎಪ್ಪತ್ತೊಂದು ಮಹಾಯುಗಗಳು ಇವೆ. ಇದರಲ್ಲಿ ಇಪ್ಪತ್ತೇಳು ಮಹಾಯುಗಗಳು ಪೂರ್ಣಗೊಂಡಿದ್ದು, ಇಪ್ಪತ್ತೆಂಟನೇ ಮಹಾಯುಗ ನಡೆಯುತ್ತಿದೆ. ಈ ಮಹಾಯುಗದ ಸತ್ಯಯುಗ, ತ್ರೇತಾಯುಗ, ದ್ವಾಪರಯುಗ ಪೂರ್ಣಗೊಂಡಿದ್ದು, ಕಲಿಯುಗ ನಡೆಯುತ್ತಿದೆ.

ಈ. ಕಲಿಯುಗದ ಮೊದಲನೇ ಚರಣ (ಪ್ರಥಮ ಪಾದ) ನಡೆಯುತ್ತಿದ್ದು, ಐದು ಸಾವಿರದ ನೂರ ಹದಿನೈದು ವರ್ಷಗಳು ಪೂರ್ಣಗೊಂಡಿವೆ. 5116ನೆ ವರ್ಷ ಈ ಯುಗಾದಿಯಂದು ಸೂರ್ಯೋದಯದೊಂದಿಗೆ ಪ್ರಾರಂಭವಾಗಿದೆ. ಈ ಯುಗಾದಿಯಂದು ಪ್ರಾರಂಭವಾಗಲಿರುವ ವರ್ಷವನ್ನು ನಿಖರವಾಗಿ ಹೇಳುವುದಾದರೆ ಮೊದಲನೇ ಪರಾರ್ಧ + (6 (ಮನ್ವಂತರ) x 71 x ಮಹಾಯುಗದ ಸಮಯ) + (28 (ಮಹಾಯುಗಗಳು) x 43,20,000) + 3 ಯುಗಗಳು (ಸತ್ಯಯುಗ, ತ್ರೇತಾಯುಗ, ದ್ವಾಪರಯುಗ) + 5127

ಈಗಿನ ಕಾಲ ಮಾನ ಕಲಿಯುಗಾಬ್ದ 5128 ಶಾಲಿವಾಹನ ಶಕ 1949, ಪರಾಭವ ನಾಮ ಸಂವತ್ಸರ, ದಕ್ಷಿಣಾಯನ, ಗ್ರೀಷ್ಮಋತು, ನಿಜ ಜ್ಯೇಷ್ಠ-ಆಷಾಢ ಮಾಸ, ಕೃಷ್ಣಪಕ್ಷ, ತಿಥಿ, ಮಹಾನಕ್ಷತ್ರ, ನಿತ್ಯ ನಕ್ಷತ್ರ, ಶುಕ್ಲ ನಾಮ ಯೋಗ, ಭದ್ರೆ ಕರಣ, ಸೋಮವಾರ ದಿನಾಂಕ ಜುಲೈ ತಾ 07 ಇಸವಿ 2026. ಮುಂದಿನ ಯುಗಾದಿಗೆ ಕಲಿಯುಗದ ಮೊದಲ ಪಾದದ 5128 ವರ್ಷ ಮುಗಿಯಲಿವೆ.

(ಕೃಪೆ : ಅಂತರ್ಜಾಲ)

........ರಮೇಶ ಎಂ. ಬಾಯಾರು ಎಂ.ಎ, ಬಿಎಡ್

ರಾಜ್ಯಪ್ರಶಸ್ತಿ ಪುರಸ್ಕೃತ ನಿವೃತ್ತ ಅಧ್ಯಾಪಕರು

“ಸ್ಕಂದ” ಕುಳ ಗ್ರಾಮ

ಬಂಟ್ವಾಳ ತಾಲೂಕು , ದಕ್ಷಿಣ ಕನ್ನಡ ಜಿಲ್ಲೆ

ಮೊಬೈಲ್ ಸಂಖ್ಯೆ : +91 94486 26093

rameshbayar@gmail.com 

*****************************************