ನನಗೆ ಸ್ಫೂರ್ತಿಯಾಗಿರುವ ಶಿಕ್ಷಕರು - ಹಿರಿಯರ ಬರಹಗಳು : ಸಂಚಿಕೆ - 01
Tuesday, September 5, 2023
Edit
ನನಗೆ ಸ್ಫೂರ್ತಿಯಾಗಿರುವ ಶಿಕ್ಷಕರು
ಹಿರಿಯರ ಬರಹಗಳು : ಸಂಚಿಕೆ - 01
ಕಲ್ಲೋಳಿಪ್ಪುದೆ ದೈವ?
ಕಲ್ಲಲ್ಲಿ ಕಳೆಯ ನಿಲಿಸಿದ,
ಗುರುವಿನ ಸೊಲ್ಲಲ್ಲೇ ದೈವ, ಸರ್ವಜ್ಞ."
ಎಂಬ ಸರ್ವಜ್ಞರ ನುಡಿಯಂತೆ, ಒಬ್ಬ ಗುರು ಸಾಮಾನ್ಯ ಕಲ್ಲಿನಂತಿರುವ ಮಗುವನ್ನು, ಬೋಧನೆ ಎಂಬ ಉಳಿಯಿಂದ ಕೆತ್ತಿ, ತನ್ನ ಅಪಾರವಾದ ಜ್ಞಾನ, ಸಾಮರ್ಥ್ಯ ಹಾಗೂ ಪ್ರೀತಿಯೆಂಬ ಆಯುಧದಿಂದ ಹದಗೊಳಿಸಿ ಆ ಮಗುವನ್ನು ಒಂದು ಸುಂದರವಾದ ಶಿಲೆಯನ್ನಾಗಿ ರೂಪಗೊಳಿಸುತ್ತಾನೆ ಹಾಗೂ ಆ ಶಿಲೆಗೆ ಜೀವ ತುಂಬುತ್ತಾನೆ.
ಇಂತಹ ಶ್ರೇಷ್ಠವಾದ ಸ್ಥಾನದಲ್ಲಿ ನಾನು ನನ್ನ ನೆಚ್ಚಿನ ಗುರುಗಳಾದ ಶ್ರೀ ಬಿಜು ಕೆ ಜೆ ಇವರನ್ನು ಸ್ಮರಿಸಲು ಇಚ್ಚಿಸುತ್ತಿದ್ದೇನೆ. ಗುರುಗಳ ಬಗ್ಗೆ ಅನಿಸಿಕೆ ಬರೆಯಲು ಸಿಕ್ಕಿದ್ದು ನನ್ನ ಪಾಲಿನ ಸುವರ್ಣಾವಕಾಶ.
ಮೊದಲನೆಯದಾಗಿ "ಶಿಕ್ಷಕರ ದಿನಾಚರಣೆಯ ಹಾರ್ದಿಕ ಶುಭಾಶಯಗಳು ಸರ್" ಜೀವನದಲ್ಲಿ ಯಾವುದೇ ಒಂದು ನಿರ್ದಿಷ್ಟ ಗುರಿ ಇಲ್ಲದೆ, ನನ್ನ ಸಾಮರ್ಥ್ಯವೇನೆಂಬ ಅರಿವೇ ಇಲ್ಲದೆ, ಎಲ್ಲರೊಳು ಒಬ್ಬಳಾಗಿ ನಾನು ತರಗತಿಯಲ್ಲಿದ್ದೆ. ಆದರೆ ಇಂದು ನನ್ನ ಹೆಸರು ನಾಲ್ವರಿಗೆ ತಿಳಿದಿದೆ ಎಂದರೆ ಅದಕ್ಕೆ ಕಾರಣ ನನ್ನ ಗುರುಗಳು ಹಾಗೂ ಬೆಥನಿ ವಿದ್ಯಾಸಂಸ್ಥೆ. ವಿದ್ಯಾರ್ಥಿಗಳ ಬಾಳಿಗೆ ಸ್ಫೂರ್ತಿಯಾಗಿ, ಕತ್ತಲಲ್ಲಿ ಬೆಳಕಾಗಿ ನಿಂತವರು ನನ್ನ ನೆಚ್ಚಿನ ಗುರುಗಳು. ಹಲವಾರು ಕಷ್ಟಗಳನ್ನು ಅನುಭವಿಸಿ ದಿಟ್ಟತನದಿಂದ ಎದುರಿಸಿ ಮುಂದೆ ಬಂದ ಸರ್ ನ ಬದುಕು ನಮಗೆಲ್ಲಾ ಸ್ಪೂರ್ತಿ. ಸದಾ ಹಸನ್ಮುಖಿ, ಸಹೃದಯಿ, ಸಕಾರಾತ್ಮಕ ಚಿಂತಕ, ಸಹಕಾರಿ ಹೀಗೆ ಹಲವಾರು ಮೌಲ್ಯಗಳನ್ನು ಹೊಂದಿದ ಶ್ರೇಷ್ಠ ವ್ಯಕ್ತಿತ್ವ ಗುರುಗಳದು. ಅಂತೆಯೇ ಸರ್ ತಮ್ಮ ವಿದ್ಯಾರ್ಥಿಗಳಿಗೆ ಪುಸ್ತಕದ ಬದನೆಕಾಯಿಯ ಹೊರತಾಗಿ ಜೀವನ ಪಾಠ ಹಾಗೂ ಮೌಲ್ಯಗಳನ್ನು ಮನವರಿಕೆ ಮಾಡಿಸುತ್ತಾರೆ. ಸರ್ ತಮ್ಮ ವೃತ್ತಿ ಜೀವನವು ಸುಗಮವಾಗಿ ಸಾಗಲಿ ಎಂದು ಈ ಮೂಲಕ ಹಾರೈಸುತ್ತಿದ್ದೇನೆ.....
ಮೊದಲನೆಯದಾಗಿ "ಶಿಕ್ಷಕರ ದಿನಾಚರಣೆಯ ಹಾರ್ದಿಕ ಶುಭಾಶಯಗಳು ಸರ್" ಜೀವನದಲ್ಲಿ ಯಾವುದೇ ಒಂದು ನಿರ್ದಿಷ್ಟ ಗುರಿ ಇಲ್ಲದೆ, ನನ್ನ ಸಾಮರ್ಥ್ಯವೇನೆಂಬ ಅರಿವೇ ಇಲ್ಲದೆ, ಎಲ್ಲರೊಳು ಒಬ್ಬಳಾಗಿ ನಾನು ತರಗತಿಯಲ್ಲಿದ್ದೆ. ಆದರೆ ಇಂದು ನನ್ನ ಹೆಸರು ನಾಲ್ವರಿಗೆ ತಿಳಿದಿದೆ ಎಂದರೆ ಅದಕ್ಕೆ ಕಾರಣ ನನ್ನ ಗುರುಗಳು ಹಾಗೂ ಬೆಥನಿ ವಿದ್ಯಾಸಂಸ್ಥೆ. ವಿದ್ಯಾರ್ಥಿಗಳ ಬಾಳಿಗೆ ಸ್ಫೂರ್ತಿಯಾಗಿ, ಕತ್ತಲಲ್ಲಿ ಬೆಳಕಾಗಿ ನಿಂತವರು ನನ್ನ ನೆಚ್ಚಿನ ಗುರುಗಳು. ಹಲವಾರು ಕಷ್ಟಗಳನ್ನು ಅನುಭವಿಸಿ ದಿಟ್ಟತನದಿಂದ ಎದುರಿಸಿ ಮುಂದೆ ಬಂದ ಸರ್ ನ ಬದುಕು ನಮಗೆಲ್ಲಾ ಸ್ಪೂರ್ತಿ. ಸದಾ ಹಸನ್ಮುಖಿ, ಸಹೃದಯಿ, ಸಕಾರಾತ್ಮಕ ಚಿಂತಕ, ಸಹಕಾರಿ ಹೀಗೆ ಹಲವಾರು ಮೌಲ್ಯಗಳನ್ನು ಹೊಂದಿದ ಶ್ರೇಷ್ಠ ವ್ಯಕ್ತಿತ್ವ ಗುರುಗಳದು. ಅಂತೆಯೇ ಸರ್ ತಮ್ಮ ವಿದ್ಯಾರ್ಥಿಗಳಿಗೆ ಪುಸ್ತಕದ ಬದನೆಕಾಯಿಯ ಹೊರತಾಗಿ ಜೀವನ ಪಾಠ ಹಾಗೂ ಮೌಲ್ಯಗಳನ್ನು ಮನವರಿಕೆ ಮಾಡಿಸುತ್ತಾರೆ. ಸರ್ ತಮ್ಮ ವೃತ್ತಿ ಜೀವನವು ಸುಗಮವಾಗಿ ಸಾಗಲಿ ಎಂದು ಈ ಮೂಲಕ ಹಾರೈಸುತ್ತಿದ್ದೇನೆ.....
ದ್ವಿತೀಯ ಬಿ ಎ
ಸಂತ ಆಗ್ನೇಸ್ ಸ್ವಾಯತ್ತ ಕಾಲೇಜ
ಮಂಗಳೂರು , ದಕ್ಷಿಣ ಕನ್ನಡ ಜಿಲ್ಲೆ
******************************************
ನಾನಾಗ ಉದ್ದ ಜಡೆಯ ಹುಡುಗಿ ಆದರೆ ಜಡೆಯನ್ನು ಕಟ್ಟಲಾಗದೆ ತುರುಬು ಹಾಕಿಕೊಂಡು ಶಾಲೆಗೆ ಹೋಗಿದ್ದೆ. ಮನೆಯಲ್ಲಿ ಅಮ್ಮನಿಗೆ ತೀವ್ರ ಅನಾರೋಗ್ಯ. ಪಾಪ ಅಪ್ಪ ಏನು ಮಾಡಿಯಾರು. ತಮಗೆ ಗೊತ್ತಿದ್ದ ಹಾಗೆ ನನ್ನ ಮತ್ತು ತಂಗಿಯ ಕೂದಲು ಕಟ್ಟಿ ಕಳಿಸುವರು. ನಾವಿಬ್ಬರು ನಡೆದುಕೊಂಡು ಶಾಲೆಗೆ ಹೋಗಬೇಕು. ನಾನಾಗ ಐದನೇ ತರಗತಿಯಲ್ಲಿದ್ದೆ. ನಾನು ಶಾಲೆ ಮುಟ್ಟಿದಾಗ ಆ ನನ್ನ ಶಿಕ್ಷಕಿ ನನ್ನನ್ನು ಕರೆದು ಮಾತೆಯಂತೆ ನನ್ನ ಕೂದಲನ್ನು ಸರಿಯಾಗಿ ಕಟ್ಟಿ, ತರಗತಿಗೆ ಕಳುಹಿಸಿದರು. ಶಾಲೆಯಲ್ಲಿ ಮಕ್ಕಳ ಹುಟ್ಟು ಹಬ್ಬವಿದ್ದಾಗ ಅವರಿಗೆ ನೀಡಿದ ಉಂಡೆಯನ್ನು ನನಗೆ ನೀಡಿ ತಿನ್ನು ಎಂದು ನಗೆ ಬೀರಿದ ಮಾತೆಯ ಹೃದಯವದು. ನನಗೆ ಓದಲು ಬಾರದಿರುವ ಸಂದರ್ಭದಲ್ಲಿ ನನಗೆ ಓದಲು ಬರೆಯಲು ಸ್ಪೂರ್ತಿ ನೀಡಿದ ಗುರು ನನ್ನ ಟೀಚರ್. ಒಂದು ದಿನ ನನಗೆ 7ನೇ ತರಗತಿಯ ಶುಲ್ಕ ಕಟ್ಟಲಾಗದಿದ್ದಾಗ ನನ್ನ ಶುಲ್ಕ ಕಟ್ಟಿದಾಗ ನನ್ನ ಟೀಚರನ್ನು ನೋಡಿ ಕಣ್ಣೀರು ಸುರಿಸಿದ್ದೆ. ಅವರು ಯಾವಾಗಲೂ ಹೇಳುತ್ತಿದ್ದರು... ಲಲಿತ ನೀನು ಸಹ ಟೀಚರ್ ಆಗಬೇಕೆಂದು. ಎತ್ತಣ ಮಾಮರ ಎತ್ತಣ ಕೋಗಿಲೆ ಎಂಬಂತೆ ನನ್ನ ಮತ್ತು ನನ್ನ ಟೀಚರ್ ಅನುಬಂಧ. ಅವರ ಮಾತಿನಿಂದಲೇ ನಾನು ಇಂದು ಶಿಕ್ಷಕಿಯಾಗಿ , ಆ ನನ್ನ ಶಿಕ್ಷಕಿಯ ನಗುವನ್ನು ಈ ಮುದ್ದು ಮಕ್ಕಳಲ್ಲಿ ಕಾಣುತ್ತಿದ್ದೇನೆ ಎಂದು ಹೇಳಲು ನನ್ನ ಕಣ್ಣು ಮಂಜಾಗಿ ಗದ್ಗದಿತಳಾಗಿದ್ದೇನೆ.
ಸಹ ಶಿಕ್ಷಕಿ
MKET'S LKEM ಸ್ಕೂಲ್
ಹರಿಹರ, ದಾವಣಗೆರೆ
******************************************
ಪದವಿ ಮುಕ್ತಾಯದ ಕೊನೆಯ ತರಗತಿಯಲ್ಲಿ ಇವರು ವಿದ್ಯಾರ್ಥಿನಿಯರಿಗೆಲ್ಲ ಮುಂದಿನ ಬದುಕಿಗೆ ಶುಭಹಾರೈಸಿ ತಾವೇ ಕಣ್ಣೀರಾದದ್ದು ಇನ್ನೂ ಕಣ್ಣಿಗೆ ಕಟ್ಟಿದಂತೆ ಇದೆ. ಎಲ್ಲರಿಗೂ ಬಯಸಿದಂತೆ ಬದುಕು ಸಿಗುವುದಿಲ್ಲ. ಯಾರಿಗೆ ಯಾವ ರೀತಿ ಬದುಕು ಸಿಗುತ್ತೋ ಹೇಳಲು ಬರದು. ಆದರೆ ಎಲ್ಲರೂ ಯಾವತ್ತೂ ಖುಷಿಯಾಗಿರಿ, ಏನೇ ಬಂದರೂ ಧೈರ್ಯವಾಗಿರಿ ಎಂಬ ಅರ್ಥದ ಮಾತುಗಳನ್ನು ಹೇಳುತ್ತ ಹೇಳುತ್ತ ಕಣ್ಣೀರಾಗಿದ್ದರು. ಇಷ್ಟರಮಟ್ಟಿಗೆ ಇವರು ನಮ್ಮನ್ನೆಲ್ಲ ಆಂತರ್ಯದಿಂದ ಪ್ರೀತಿಸುತ್ತಿದ್ದರು. ನಮ್ಮ ತರಗತಿಯಲ್ಲಿ ಮುಂಗೈಗಳಿಲ್ಲದೆ ಎರಡೂ ಅಂಗೈ ಜೋಡಿಸಿ ಬರೆಯುವ ಓರ್ವ ಪ್ರತಿಭಾನ್ವಿತ ವಿದ್ಯಾರ್ಥಿನಿಯಿದ್ದಳು. ಆ ವರ್ಷ ಕಾಲೇಜಿನ Best outgoing Student ಪ್ರಶಸ್ತಿ ಅವಳಿಗೆ ಸಿಗಲು ಮುಖ್ಯವಾಗಿ ಕಾರಣರಾಗಿ ನಮಗೆಲ್ಲ ಸಾಮಾಜಿಕ ಸ್ಪಂದನೆಯ ಮಾದರಿ ಪಂಕ್ತಿಯನ್ನು ಹಾಕಿ ಕೊಟ್ಟವರು ಇವರು.
ಜೀವನದ ಏನೋ ಪರಿಸ್ಥಿತಿಯಿಂದ ಒಂದೆರೆಡು ದಿನಗಳಲ್ಲ. ಒಂದೆರೆಡು ತಿಂಗಳುಗಳ ಕಾಲ ಕಾಲೇಜಿನ ತರಗತಿಗಳಿಗೆ ಹಾಜರಾಗಲಾಗಿರಲಿಲ್ಲ. ಆ ಬಳಿಕ ಹೋದರೂ ಮೊದಲಿನ ಉತ್ಸಾಹವೂ, ಆತ್ಮವಿಶ್ವಾಸವೂ ಇರಲಿಲ್ಲ. ಈ ಸಂದರ್ಭ ನನ್ನಲ್ಲಿ ಮರಳಿ ಉತ್ಸಾಹ ಬರಲು ಕಾರಣರಾದವರು ನನ್ನ ಪ್ರೀತಿಯ ಉಷಾ ಮೇಡಂ. ಬಹಳ ತಾಳ್ಮೆಯಿಂದ ನನ್ನೆಲ್ಲ ನೋವು -ನಲಿವುಗಳಿಗೆ ಸ್ಪಂದಿಸಿ ಅಕ್ಕರೆಯ ಮಹಾಪೂರವನ್ನೇ ಹರಿಸಿ ಮೊದಲಿಗಿಂತ ದುಪ್ಪಟ್ಟು ಉತ್ಸಾಹವನ್ನು ಜೀವನದಲ್ಲಿ ತಂದರು. ಪಿ.ಯು.ಸಿ.ಯಲ್ಲಿ ತಾಲೂಕು ಮಟ್ಟಕ್ಕೆ ಪ್ರಥಮ ಸ್ಥಾನಿಯಾಗಿದ್ದರೂ ಅಂತಿಮ ವರ್ಷದ ಪದವಿಯಲ್ಲಿ ಬದುಕಿನ ಏರಿಳಿತಗಳಿಂದ ಕಲಿಕೆಯಲ್ಲಿ ಏಕಾಗ್ರತೆಯನ್ನೂ, ನನ್ನಿಷ್ಟದ ಗ್ರಂಥಾಲಯದ ಪುಸ್ತಕಗಳ ಓದಿನಲ್ಲೂ ಆಸಕ್ತಿಯನ್ನು ಕಳೆದುಕೊಂಡಿದ್ದ ನನ್ನಲ್ಲಿ ಮತ್ತೆ ಜೀವನೋತ್ಸಾಹ ತರಲು ಇವರು ಮಾಡುತ್ತಿದ್ದ ನನ್ನ ಮನೆಭೇಟಿಗೆ ಲೆಕ್ಕವೇ ಇಲ್ಲ. ನನ್ನ ಮುಖದಲ್ಲಿ ಖುಷಿ ಹೆಚ್ಚಬೇಕೆಂದು ಅವರು ಯಾವತ್ತೂ ಹಂಬಲಿಸುತ್ತಿದ್ದರೇ ವಿನಃ ಹೆಚ್ಚು ಅಂಕ ಗಳಿಸಿ ಕಾಲೇಜಿಗೆ ಕೀರ್ತಿ ತರಬೇಕು ಎನ್ನುವಂತಹ ಮಾತುಗಳನ್ನು ಯಾವತ್ತೂ ಆಡಿದ್ದೇ ಇಲ್ಲ. ಇವೆಲ್ಲವೂ ಶಿಕ್ಷಕಿಯಾಗಿ ಇಂದು ನನ್ನ ವಿದ್ಯಾರ್ಥಿಗಳಿಗೆ ಬದುಕಿನಲ್ಲಿ ಭರವಸೆ ತುಂಬುವಲ್ಲಿ ನಾನು ಯಾವ ರೀತಿ ಸ್ಪಂದಿಸಬೇಕು ಎನ್ನುವುದಕ್ಕೆ ಸ್ಫೂರ್ತಿಯಾಗಿದೆ. ನನ್ನ ಶಾಲಾಮಕ್ಕಳ ತೀವ್ರ ಅನಾರೋಗ್ಯದ ಸಂದರ್ಭ ಎಷ್ಟೋ ಬಾರಿ ನನಗೆ ಅಂದುಕೊಂಡಷ್ಟು ಮನೆಭೇಟಿ ಮಾಡಿ ಧೈರ್ಯ ತುಂಬಲು, ಅಕ್ಕರೆ ತೋರಲು ಸಾಧ್ಯವಾಗಿಲ್ಲ. ಇಂತಹ ಸಂದರ್ಭ ನನಗೆ ಪ್ರತಿ ಬಾರಿಯೂ ನನ್ನ ಪ್ರೀತಿಯ ಉಷಾ ಮೇಡಂ ನೆನಪಾಗುತ್ತಾರೆ. ಅವತ್ತು ನನ್ನೊಬ್ಬಳ ಮನೆಗೆ ಎಷ್ಟು ಬಾರಿ ಮೇಡಂ ಬಂದಿದ್ದರಲ್ಲ.. ಈ ಸಾಧ್ಯತೆಗೆ ಅವರಲ್ಲಿ ತಮ್ಮ ವಿದ್ಯಾರ್ಥಿಗಳ ಬಗ್ಗೆ ಎಷ್ಟೊಂದು ಕಾಳಜಿಯಿತ್ತು ಎಂದು ಕೃತಜ್ಞತೆಯಿಂದ ಮನ ನೆನೆಯುತ್ತದೆ. ಕೆಲವು ಅಸಹಾಯಕ ಪರಿಸ್ಥಿತಿಯಲ್ಲಿರುವ, ಯಾರೊಂದಿಗೂ ಹೇಳಿಕೊಳ್ಳಲಾಗದ ಬದುಕಿನ ತೊಳಲಾಟಗಳಲ್ಲಿ ಸಂಕಟಪಡುವ ವಿದ್ಯಾರ್ಥಿಗಳ ಬದುಕಿನಲ್ಲಿ ಶಿಕ್ಷಕರ ಒಂದು ಸಣ್ಣ ಸ್ಪಂದನೆ, ಕಾಳಜಿ, ಅಕ್ಕರೆ ಎಂಥಹ ಸಕಾರಾತ್ಮಕ ಬದಲಾವಣೆಯನ್ನು ತರಬಲ್ಲದು ಎನ್ನುವುದನ್ನು ನನ್ನ ಜೀವನದಲ್ಲಿ ಅರ್ಥ ಮಾಡಿಸಿದವರು ನನ್ನ ಉಷಾ ಮೇಡಂ. ನನ್ನ ವಿದ್ಯಾರ್ಥಿಗಳ ನೋವುನಲಿವುಗಳಿಗೆ ನಾನು ಕಿಂಚಿತ್ತಾದರೂ ಸ್ಪಂದಿಸುತ್ತೇನೆ ಎಂದಾದರೆ ನನಗೆ ಸ್ಫೂರ್ತಿಯಾದವರು ನನ್ನ ಉಷಾ ಮೇಡಂ.
ಸಹ ಶಿಕ್ಷಕಿ
ಸರಕಾರಿ ಹಿರಿಯ ಪ್ರಾಥಮಿಕ ಶಾಲೆ,
ಹೊಕ್ಕಾಡಿಗೋಳಿ
ಬೆಳ್ತಂಗಡಿ ತಾಲೂಕು, ದಕ್ಷಿಣ ಕನ್ನಡ ಜಿಲ್ಲೆ
******************************************
ಕಾಳಿ ದಂಡೆಯ ಮೇಲಿನ ಪುಟ್ಟ ಗ್ರಾಮ ಈ ಊರು ನಿಸರ್ಗದ ಸೌಂದರ್ಯದ ತವರೂರು ನಮ್ಮೂರು. ಉತ್ತರ ಕನ್ನಡ ಜಿಲ್ಲೆಯ ಕಾರವಾರ ತಾಲೂಕಿನ ಪುಟ್ಟ ಊರು, ಗೋವಾ ರಾಜ್ಯದ ಗಡಿ ಭಾಗವಾದ್ದರಿಂದ ಕೊಂಕಣಿಯೇ ಇವರ ಪಂಚಪ್ರಾಣ ಮಾತೃ ಭಾಷೆ. ಬದುಕನ್ನು ಅರಸಿ ಹೊನ್ನಾವರದಿಂದ ಕಾರವಾರಕ್ಕೆ ನಮ್ಮ ಅಪ್ಪನ ಪಯಣ. ಬಟ್ಟೆ ಅಂಗಡಿಯಲ್ಲಿ ಕೆಲಸ. ಬಡತನದಲ್ಲೂ ಕಲಿತದ್ದು ಪಿಯುಸಿ ಸೈನ್ಸ್.
ಶ್ರೀ ಮಹಾಮಾಯ ಪ್ರೌಢಶಾಲೆ ಬಾಳ್ನಿ
ಉತ್ತರ ಕನ್ನಡ ಬಾಳ್ನಿ ಗ್ರಾಮದ ತುತ್ತ ತುದಿಗೆ ದೊಡ್ಡ ಮೈದಾನ. ಆ ಮೈದಾನದಲ್ಲಿ ವಿರಾಜಸುತ್ತಿದೆ ಮಹಾಮಾಯ ಪ್ರೌಢಶಾಲೆ ಸಾವಿರಾರು ವಿದ್ಯಾರ್ಥಿಗಳಿಗೆ ವಿದ್ಯಾ ದಾನವನ್ನು ನೀಡಿದ ಸಂಸ್ಥೆ. ಗುಮಾಸ್ತ ಹುದ್ದೆಗಾಗಿ ಅರ್ಜಿಯನ್ನು ಆಹ್ವಾನಿಸಿದರು ಅದರಂತೆ ನಮ್ಮ ಅಪ್ಪ ಈ ಪ್ರೌಢಶಾಲೆಯನ್ನು ತಮ್ಮ ಬದುಕಿನ ಅಂಗವಾಗಿಸಿ ಒತ್ತಾಸೆಯಂತೆ ಗುರುಗಳ ಕೆಲಸವನ್ನು ಸಹ ನಿಭಾಯಿಸುತ್ತಾ ಅಪರಿಮಿತ ಸೇವೆಯನ್ನು ನೀಡಿದರು.
ನಮ್ಮ ತಂದೆಯವರ ಶಿಸ್ತು ಸಮಯ ಪ್ರಜ್ಞೆ
ಗಣಿತ ಶಿಕ್ಷಕಿ ಆಗಲು ನನ್ನನ್ನು ಪ್ರೇರೇಪಿಸಿತು.
ಎಂಟನೇ ತರಗತಿಯಲ್ಲಿ ಗಣಿತದ ಮೂಲ ಅನುಭವವನ್ನು ಪಡೆದುಕೊಂಡದ್ದು ನಮ್ಮ ಅಪ್ಪಾಜಿಯವರ ಪಾಠ ಮಾರ್ಗದರ್ಶನದಲ್ಲಿ
ಅಂದೇ ನನಗೆ ಬಿಂದು ಅಂದರೆ ಏನು? ಅದರ ವಿಶೇಷತೆ ಏನು? ರೇಖಾ ಗಣಿತದ ಮೂಲ ಪರಿಕಲ್ಪನೆಗಳನ್ನು ಮನಸ್ಸಿಗೆ ತಟ್ಟುವ ಹಾಗೆ ವಿವರಿಸಿದ ಅಂದಿನ ನನ್ನ ಅಪ್ಪನ ಪಾಠಗಳು ಇಂದಿಗೂ ಕಣ್ಣಮುಂದಿದೆ. ಒಂದು ದಿನ ಪೆನ್ಸಿಲ್ ಮೊನಚು ಮಾಡದೇ ಅವರಿಂದ ಪಡೆದ ಕಠಿಣ ಶಿಕ್ಷೆ ಎಂದಿಗೂ ಮರೆಯಲಾಗದ ಪಾಠ. ಹೀಗೆ ಮೂರು ವರ್ಷಗಳು ಈ ಶಾಲೆಯಲ್ಲಿ ಈ ಸಂಸ್ಥೆಯಲ್ಲಿ ಕಳೆದದ್ದು ಇಂದಿಗೂ ಸ್ಮೃತಿ ಪಟಲದಲ್ಲಿ ಅಜರಾಮರ ಕನ್ನಡ ಪಂಡಿತರಿಂದ ಭಾಷಾ ಕೌಶಲ್ಯ ಮಾತಿನ ಕೌಶಲ್ಯ ಭಾಷಣ ಕೌಶಲ್ಯ ವ್ಯಾಕರಣ ಕೌಶಲ್ಯ ಅವರ ಪಾಠವೇ ಯಕ್ಷಗಾನದ ಆಟದಂತೆ. ಒಂದು ಸಲ ಕೇಳಿದರೆ ಎಂದೆಂದಿಗೂ ಆ ಪಾಠದ ತಾತ್ಪರ್ಯವನ್ನು ಮರೆಯಲಾರೆವು ಅಂತಹ ಕಂಠ ಮಾಧುರ್ಯ ಗಾಂಭೀರ್ಯ ಅವರದಾಗಿತ್ತು. ಆ ಎಲ್ಲಾ ಕಲೆಗಳನ್ನು ನಮ್ಮಲ್ಲಿ ವಿದ್ಯಾರ್ಥಿಗಳಾದ ನಮ್ಮಲ್ಲಿ ಅಚ್ಚು ಒತ್ತಿದರು ಗಣಿತ ವಿಜ್ಞಾನ ಶಿಕ್ಷಕರಾದ ಹೆಬ್ಬಾರ್ ರವರು. 9 ಮತ್ತು 10ನೇಗೆ ಗಣಿತ ಪಾಠ ಮತ್ತು ಎಲ್ಲಾ ತರಗತಿಗಳಿಗೆ ವಿಜ್ಞಾನ ಪಾಠವನ್ನು ಪ್ರಯೋಗಗಳ ಮೂಲಕ ಸುಲಲಿತವಾಗಿ ವಿವರಿಸುತ್ತಿದ್ದ ಅವರ ಪಾಠ ಕೌಶಲ್ಯ ಎಂದಿಗೂ ನನ್ನಲ್ಲಿ ಅಚ್ಚು ಒತ್ತಿದೆ. ಸಮಾಜ ಶಿಕ್ಷಕರಾದ ಎಂ ಬಿ ನಾಯಕ್ ಸರ್ ಅವರು ಎಂಟನೇ ತರಗತಿಗೆ ಮಾತ್ರ ನಮ್ಮೊಂದಿಗಿದ್ದರು. ದುರ್ದೈವ ವಿಧಿ ಅವರನ್ನು ಬಲಿ ತೆಗೆದುಕೊಂಡಿತು. ಹಿಂದಿ ಶಿಕ್ಷಕಿ ರಾಯ್ಕರ್ ಬಾಯಿಯವರು ಹಿಂದಿ ಭಾಷೆಯ ಮೇಲಿನ ಅವರ ಪಾಂಡಿತ್ಯ ಪಾಠ ಮಾಡುವಾಗ ಹಿಂದಿಯಲ್ಲಿ ಹಾಡಿದ ಹಾಡುಗಳು ಸುಲಲಿತವಾಗಿ ಹಿಂದಿಯನ್ನು ಓದಲು ಬರೆಯಲು ಹೇಳಿಕೊಟ್ಟ ಮಹಾ ಗುರು ಅವರು ಅದರ ಜೊತೆಗೆ ಜೀವನದ ಪಾಠವನ್ನು ಅರುಹಿದ ಮಹಾತಾಯಿ ಇನ್ನು ಹೊಲಿಗೆ ಶಿಕ್ಷಕಿ ಸರೋಜಿನಿ ಯವರು ನಮಗೆ ಹೊಲಿಗೆಯನ್ನು ಕಲಿಸುವುದರೊಂದಿಗೆ ಸರ್ವ ವಿಧದ ನೈತಿಕ ಪಾಠಗಳನ್ನು ಹೇಳಿಕೊಡುತ್ತಿದ್ದರು ನಮ್ಮ ಬಗ್ಗೆ ವಿಶೇಷ ಪ್ರೀತಿ ಅಭಿಮಾನವನ್ನು ಹೊಂದಿದ್ದರು.
ಇಂದಿನ ಶಿಕ್ಷಕ ವೃತ್ತಿಗೆ ನಾನು ಪಾದಾರ್ಪಣೆ ಮಾಡಲು ಆಗ ಪ್ರೌಢಶಾಲೆಯಲ್ಲಿ ನನ್ನ ಎಲ್ಲ ಗುರುಗಳು ನೀಡಿದ ಸಲಹೆ ಮಾರ್ಗದರ್ಶನ ಸಂಪೂರ್ಣ ಸಹಕಾರವನ್ನು ಆತ್ಮವಿಶ್ವಾಸವನ್ನು ನೀಡಿತ್ತು. ಆದರೆ ಮೊನ್ನೆ ಅಪ್ಪಾಜಿಯೊಂದಿಗೆ ದೂರವಾಣಿ ಮೂಲಕ ಮಾತನಾಡಿದಾಗ ಬೇಸರದ ಸಂಗತಿ ಬಯಲಾಯಿತು ಅಳಿವಿನ ಅಂಚಿನಲ್ಲಿ ನಮ್ಮ ಕನ್ನಡ ಮಾಧ್ಯಮದ ಪ್ರೌಢಶಾಲೆ ಎಂಬ ವಿಷಯ ತಿಳಿದು ಅಪ್ಪನಿಗೆ ಅತೀವ ವೇದನೆ ಅವರ ಕೊರಗಿನ ಮಾತುಗಳು ನನಗೆ ಸಹ ಬೇಸರವಾಯಿತು. ನಾನು ಕಲಿತ ಶಾಲೆ ನನ್ನ ಎಲ್ಲಾ ಕನಸುಗಳಿಗೆ ಜೀವ ಕಟ್ಟಿದ ಶಾಲೆ ಇವತ್ತು ಕೇವಲ 8ನೇ ತರಗತಿಗೆ ಐದು ವಿದ್ಯಾರ್ಥಿಗಳು ಪ್ರವೇಶಾತಿಯನ್ನು ಹೊಂದಿದ್ದಾರೆ ಎಂಬ ವಿಷಯ ತಿಳಿದು ತುಂಬಾ ಬೇಸರವಾಯಿತು. ಶ್ರೀ ಮಹಾಮಾಯಿದೇವಿಯೇ ಈ ಸಂಸ್ಥೆಯನ್ನು ಕಾಪಾಡಲಿ ಇಲ್ಲಿರುವ ಶಿಕ್ಷಕರಿಗೆ ಸ್ಪೂರ್ತಿಯನ್ನು ನೀಡಲಿ ಇನ್ನು ಮುಂಬರುವ ದಿನಗಳಲ್ಲಿ ನೂರಾರು ವಿದ್ಯಾರ್ಥಿಗಳು ಈ ಶಾಲೆಗೆ ಪ್ರವೇಶಾತಿಯನ್ನು ಹೊಂದಲಿ ಅವರ ಹೊಂಗನಸುಗಳಿಗೆ ಈ ಸಂಸ್ಥೆ ಬೆಳಕಾಗಲಿ ಎಂದು ಆಶಿಸುತ್ತೇನೆ.
ಸಹ ಶಿಕ್ಷಕಿ
ಸರಕಾರಿ ಪದವಿ ಪೂರ್ವ ಕಾಲೇಜು
ಪ್ರೌಢಶಾಲಾ ವಿಭಾಗ ಕಾಟಿಪಳ್ಳ
7ನೇ ವಿಭಾಗ
ಮಂಗಳೂರು, ದಕ್ಷಿಣ ಕನ್ನಡ ಜಿಲ್ಲೆ
*****************************************
W/o ಶ್ರೀನಿವಾಸ ದೈಪಲ
'ಚೈತನ್ಯ ' ನೆಲ್ಯಡ್ಕ, ಅಂತರ,
ನರಿಕೊಂಬು ಅಂಚೆ ಮತ್ತು ಗ್ರಾಮ
ಬಂಟ್ವಾಳ ತಾಲೂಕು, ದಕ್ಷಿಣ ಕನ್ನಡ ಜಿಲ್ಲೆ
*****************************************
ಅವತ್ತು ಆ ದಿನ ತೋರಿದ ದಾರಿದೀಪ ನನ್ನ ಜೀವನವನ್ನೇ ಬೆಳಗಿಸಿತು. ಅವರು ಪಾಠ ಮಾಡುವಾಗ ನನ್ನಲ್ಲಿ ಸಾಹಿತ್ಯದ ಅಭಿರುಚಿ ಬೆಳಸಿದರು. ಅವರು ಅಂದು ನನ್ನ ಮನದಲ್ಲಿ ಸಾಹಿತ್ಯದ ಸಸಿ ನೆಟ್ಟು ನೀರೆರೆದು ಪೋಷಿಸಿದ್ದರಿಂದ ಇಂದು ಬೆಳೆದು ಹೆಮ್ಮರವಾಗಿ ಹಲವಾರು ಪ್ರಶಸ್ತಿಗಳು ಅಂದರೆ ಸಾಹಿತ್ಯ ರತ್ನ ಸಾಹಿತ್ಯ ಭೂಷಣ, ಅತ್ಯುತ್ತಮ ಸಾಹಿತಿ ಎಂಬ ಪ್ರಶಸ್ತಿಗಳನ್ನು ಮುಡಿಗೇರಿಸಿಕೊಳ್ಳಲು ಸಾಧ್ಯವಾಯಿತು.
ಇನ್ನೊಂದು ಮುಖ್ಯವಾದ ಮಹತ್ವವಾದ ನನ್ನ ಜೀವನಕ್ಕೆ ಬಂಗಾರದ ಬೆಳಕನ್ನು ನೀಡುವಲ್ಲಿ ಭವಿಷ್ಯವನ್ನು ಉಜ್ವಲವಾಗಿಸಿದ ನನ್ನ ಜೀವನ ಪರ್ಯಂತ ಹೃನ್ಮನದಲ್ಲಿ ನೆನೆಯುವಂತೆ ಮಾಡಿದವರು ನನ್ನ ನೆಚ್ಚಿನ ಗುರುಗಳು. ಕಾಲೇಜು ಶಿಕ್ಷಣ ಮುಗಿಸಿದ ನಂತರ ನನ್ನ ವಿದ್ಯಾಭ್ಯಾಸ ಕೊನೆಗೊಳ್ಳುವ ಹಂತದಲ್ಲಿದ್ದಾಗ ಮತ್ತೆ ಪ್ರವೇಶ ಮಾಡಿ ಶಿಕ್ಷಣ ಮುಗಿಸಿ ಪವಿತ್ರವಾದ ಶಿಕ್ಷಕ ಹುದ್ದೆಗೆ ಆಯ್ಕೆಯಾಗಿ ಇಂದು ಸಾರ್ಥಕ 26 ವರ್ಷಗಳ ಸೇವೆ ಸಲ್ಲಿಸುವಲ್ಲಿ ಕಾರಣೀ ಭೂತರಾದಂತವರು. ನನ್ನ ಬೆನ್ನೆಲುಬಾಗಿ ನಿಂತು ಪ್ರೇರಣೆ ಪ್ರೋತ್ಸಾಹ ನೀಡಿದವರು ನನ್ನ ಗುರುಗಳು. ಶಿಕ್ಷಕ ಒಬ್ಬ ಮಾಂಸದ ಮುದ್ದೆಯನ್ನು ತಿದ್ದಿ ತೀಡಿ ಸುಂದರ ವಿಗ್ರಹವನ್ನಾಗಿಸುವ ಕಲಾವಂತ. ನಾನು ಇವತ್ತು ಸಾಮಾಜಿಕ ಜೀವನದಲ್ಲಿ ಉತ್ತಮ ಹೆಸರು ಗಳಿಸಲು ಆರ್ಥಿಕವಾಗಿ ಭದ್ರವಾಗಿರಲು ನನ್ನ ಶಾಲೆಯ ಮಕ್ಕಳ ಮನಸ್ಸಿನಲ್ಲಿ ಉತ್ತಮ ಶಿಕ್ಷಕಿಯಾಗಿ ಉಳಿದಿದ್ದೀನಿ ಅಂದರೆ ಸಾಹಿತ್ಯ ಕ್ಷೇತ್ರದಲ್ಲಿ ನನ್ನನ್ನು ಗುರುತಿಸಿಕೊಂಡಿದ್ದೇನೆ ಅಂದ್ರೆ ಜ್ಯೋತಿಯಂತೆ ಬೆಳಕನ್ನು ನೀಡಿದವರು ನನ್ನ ಗುರುಗಳು. ನನ್ನ ಸ್ಪೂರ್ತಿಯ ಚಿಲುಮೆ ಅವರನ್ನು ಸದಾ ಪ್ರತಿನಿತ್ಯ ಸ್ಮರಿಸಿ ಬೆಳಗಿನ ಕೆಲಸಗಳನ್ನು ಪ್ರಾರಂಭಿಸುತ್ತೇನೆ. ಅವರ ಆಶೀರ್ವಾದದ ಫಲದಿಂದ ಉತ್ತಮ ಜೀವನ ನಡೆಸುತ್ತಿದ್ದೇನೆ. ಅವರಂತಹ ಉಪಾಧ್ಯಾಯರು ಎಲ್ಲಾ ಮಕ್ಕಳಿಗೂ ಸಿಗುವಂತೆ ಮಾಡು ಭಗವಂತ. ನನ್ನ ನೆಚ್ಚಿನ ಗುರುಗಳಿಗೆ ಕೋಟಿ ಕೋಟಿ ನಮನಗಳು. ಧನ್ಯವಾದಗಳೊಂದಿಗೆ ನಿಮ್ಮ ಪ್ರೀತಿಯ ವಿದ್ಯಾರ್ಥಿನಿ
ಸಾಹಿತಿ, ಶಿಕ್ಷಕಿ
ಸಿರಿಗೆರೆ, ಚಿತ್ರದುರ್ಗ ತಾಲೂಕು
ಚಿತ್ರದುರ್ಗ ಜಿಲ್ಲೆ
*****************************************
