ಸ್ಫೂರ್ತಿಯ ಮಾತುಗಳು : ಸಂಚಿಕೆ - 67
Monday, June 12, 2023
Edit
ರಾಜ್ಯಪ್ರಶಸ್ತಿ ಪುರಸ್ಕೃತ ನಿವೃತ್ತ ಅಧ್ಯಾಪಕರು
ಬಂಟ್ವಾಳ ತಾಲೂಕು , ದಕ್ಷಿಣ ಕನ್ನಡ ಜಿಲ್ಲೆ
ಮೊಬೈಲ್ ಸಂಖ್ಯೆ : +91 94486 26093
rameshbayar@gmail.com
ಸ್ಫೂರ್ತಿಯ ಮಾತುಗಳು : ಸಂಚಿಕೆ - 67
ಈ ವಚನದ ಮೂಲಕ ಭಕ್ತಿ ಭಂಡಾರಿ ಬಸವಣ್ಣನವರು ಬಯಕೆಗಳ ಸೆಳೆತಕ್ಕೆ ಕಾರಣವಾಗುವ ಅಂಗಗಳನ್ನು ನಿಯಂತ್ರಿಸುವ ಶಕ್ತಿಯನ್ನು ಭಗವಂತನಿಂದ ಬೇಡುತ್ತಾರೆ. ಈ ವಚನಕ್ಕೆ ಒಂದು ಮಹತ್ತರವಾದ ಅರ್ಥವಿದೆ. ಶರೀರದ ಎಲ್ಲ ಅಂಗಾಂಗಗಳಿಗೆ ಅವುಗಳದೇ ಆದ ಚಂಚಲತೆಯಿದೆ. ಮನಸಿನ ಏಕಾಗ್ರತೆಗೆ ಭಂಗ ತಂದು, ಮನೋವಿಕಾರಕ್ಕೆ ಕಾರಣವಾದ ಚಂಚಲತೆಯನ್ನು ದೂರಮಾಡಲು ದೇವರಲ್ಲಿ ಅವರ ಭಿನ್ನಹವಿದೆ. ಪರಮಾತ್ಮನ ಪ್ರಾಪ್ತಿಗೆ ಬಾಹ್ಯ ಸೆಳೆತಗಳನ್ನು ಮೀರಿ ನಿಲ್ಲುವ ಶಕ್ತಿ ಎಲ್ಲರಿಗೂ ಬೇಕು. ಮುಕ್ತಿಯನ್ನು ಪಡೆಯಲು ವಿಕೃತ ಮನಸ್ಸು ತಡೆಯೊಡ್ಡುತ್ತದೆ. ಮಿತವಾದ ಬಯಕೆಗೆ ಅನಿಯಂತ್ರಿತ ವಿಕೃತ ಮನಸ್ಸೇ ಕಾರಣ. ಬಯಕೆಯ ಸಂಗವಳಿದು ಅನುಭಾವಸಂಗ ನಮಗೆ ಉಳಿಯ ಬೇಕು.
ಬಯಕೆಗಳು ಸಾಂಸಾರಿಕ ಜಂಜಡ. ಜಂಜಡದಿಂದ ಮುಕ್ತಿಯೇ ಜೀವನ್ಮುಕ್ತಿ. ಅನುಭಾವಿಯಾದವನಿಗೆ ವಿಕಾರ ಮನಸ್ಸು ಇರುವುದಿಲ್ಲ. ಪ್ರಪಂಚದೊಳಗಿದ್ದರೂ ಅನುಭಾವಿಗಳು ಪ್ರಾಪಂಚಿಕ ಮೋಹಗಳಿಂದ ಮುಕ್ತರಾಗುತ್ತಾರೆ. ಕೆಸರೊಳಗಿದ್ದರೂ ಕೆಸರನ್ನಂಟಿಸಿಕೊಳ್ಳದ ಕಮಲದಂತೆ ಅನುಭಾವಿಗಳು ಸಂಸಾರದೊಳಗಿದ್ದರೂ ಕಾಮನೆಯ ಕೆಸರನ್ನು ಅಂಟಿಸಿಕೊಳ್ಳದೆ, ನಿರ್ಮಲರೂ ನಿಶ್ಚಿಂತರೂ ಆಗಿರುತ್ತಾರೆ. ಬಸವಣ್ಣ ಅನುಭಾವದ ಉತ್ತುಂಗ ಶಿಖರವೇರಿದ ಮಹಾನುಭಾವ. ಸಕಲ ಸಾಧನೆಗಳ ಶಿಖರಾರೋಹಿಯಾಗಿ ಲೋಕಕ್ಕೆ ಸತ್ಪಥದ ದಿಕ್ಸೂಚಕರಾದರು.
ಸೆಳೆತಗಳಿಗೆ ಜಾರದಿರಲು, ಬಯಕೆಗಳಿಗೆ ಮುಗಿ ಬೀಳದಿರಲು ಇಂದ್ರಿಯಗಳ ಪಾತ್ರವು ಮುಖ್ಯವಾಗಿರುತ್ತದೆ. ಹೆಳವನಾದರೆ ಸೆಳೆತದೆಡೆಗೆ ಹೋಗಲಾಗದು. ಅಂಧತ್ವವೂ ಬಯಕೆಯ ನಿಯಂತ್ರಣಕ್ಕೆ ಪೂರಕ. ಕಿವುಡುತನವೂ ಅನ್ಯ ವಿಷಯಕ್ಕೆಳೆಸದಂತೆ ನಿಯಂತ್ರಣ ಸಾಧ್ಯವಿದೆ. ಕೈಕಾಲು, ಕಣ್ಣು, ಕಿವಿಗಳಿಲ್ಲದೆ ಬದುಕಿರದು. ಹೆಳವನ ಮಾಡು, ಕುರುಡನ ಮಾಡು, ಕಿವುಡನ ಮಾಡು ಎನ್ನುವಲ್ಲಿ ಆ ಅಂಗಗಳು ಬೇಡವೆಂಬ ಆಶಯವಿಲ್ಲ. ಆಕರ್ಷಣೆಗೊಳಗಾಗಿ ಮನದೊಳಗೆ ಹೊಸ ಹೊಸ ಬಯಕೆಗಳು ಹುಟ್ಟದಿರಲಿ ಎಂಬ ಘನವಾದ ಆಶಯವಷ್ಟೇ ಇದೆ. ಮಕ್ಕಳೇ, ಬಯಕೆಗಳಿರಲಿ, ಬಯಕೆ ವ್ಯಾಮೋಹವಾಗದಂತೆ ಎಚ್ಚರಿಕೆಯಿರಲಿ.
ರಾಜ್ಯಪ್ರಶಸ್ತಿ ಪುರಸ್ಕೃತ ನಿವೃತ್ತ ಅಧ್ಯಾಪಕರು
“ಸ್ಕಂದ” ಕುಳ ಗ್ರಾಮ
ಬಂಟ್ವಾಳ ತಾಲೂಕು , ದಕ್ಷಿಣ ಕನ್ನಡ ಜಿಲ್ಲೆ
ಮೊಬೈಲ್ ಸಂಖ್ಯೆ : +91 94486 26093
rameshbayar@gmail.com
********************************************
