ಬದಲಾಗೋಣವೇ ಪ್ಲೀಸ್.....! ಸಂಚಿಕೆ - 47
Wednesday, May 25, 2022
Edit
ಶಿಕ್ಷಕರು ಹಾಗೂ ತರಬೇತುದಾರರು
ಬದಲಾಗೋಣವೇ ಪ್ಲೀಸ್.....! ಸಂಚಿಕೆ - 47
ಹೌದಲ್ಲವೇ.... ನಮ್ಮ ಬದುಕೇ ಪಾಠಶಾಲೆ. ಇಲ್ಲಿ ನಡೆಯುವ ಎಲ್ಲಾ ಪರೀಕ್ಷೆಯಲ್ಲೂ ನಮಗೆ ಕಲಿಸಿದ ಗುರುವಿನ ಸ್ಥಾನದವರು, ಪೋಷಕರು, ಬಂಧುಗಳು ಉತ್ತರ ಗೊತ್ತಿದ್ದರೂ ಮೌನವಾಗಿರುತ್ತಾರೆ. ಅದರರ್ಥ ಅವರು ನಮ್ಮ ಕೈಬಿಟ್ಟಿದ್ದಾರೆ ಎಂದಲ್ಲ. ಅವರಿರುವ ಜವಾಬ್ದಾರಿಯುತ ಸ್ಥಾನಮಾನ ಅಥವಾ ಅವರಿರುವ ಪರಿಸ್ಥಿತಿ ಅವರನ್ನು ಮೌನವಾಗಿರಿಸಿದೆ. ಪರೀಕ್ಷೆಗಳಲ್ಲಿ ಸ್ವಂತವಾಗಿ ಪಾಸಾಗಲಿ ಎಂಬ ಭಾವವೂ ಇರಬಹುದು. ಅಥವಾ ಒಂದು ವರ್ಷವಿಡಿ ಕಲಿಸಿದ ಪಾಠದ ಅನ್ವಯತೆ ತಿಳಿಯುವ ಕೌತುಕವೂ ಇದ್ದಿರಬಹುದು. ಹೆಚ್ಚಾಗಿ ಪರೀಕ್ಷೆಗೆ ನಾವು ಹೇಗೆ ಸಿದ್ದರಾಗಿದ್ದೇವೆ ಎಂಬುದರ ಮೇಲೆ ಪರೀಕ್ಷೆಯ ಸುಲಭ - ಕಠಿಣತೆ ನಿಂತಿರುತ್ತದೆ. ಪರೀಕ್ಷೆಗಿಂತ ಮೊದಲು ನಾವು ಕಲಿತ ಪಾಠಗಳು... ಎದುರಿಸಿದ ಪರಿಸ್ಥಿತಿಗಳು... ನಮ್ಮ ಹಲವಾರು ಪ್ರಶ್ನೆಗಳಿಗೆ ಉತ್ತರ ನೀಡುತ್ತದೆ. ಇದು ಬದುಕಿನಲ್ಲಿ ಪಾಸಾಗಲು ಸಾಕಾಗುತ್ತದೆ. ಆದರೆ ಪರೀಕ್ಷೆಯಲ್ಲಿ ಎದುರಿಸುವ ಅನಿರೀಕ್ಷಿತ ಪ್ರಶ್ನೆಗಳಿಗೆ ಬುದ್ಧಿವಂತರಾದವರು ಹೇಗಾದರೂ ಉತ್ತರಿಸುತ್ತಾರೆ, ಆದರೆ ಸಾಮಾನ್ಯರಿಗೆ ಉತ್ತರ ಹೊಳೆಯದು. ಆಗ ಸಹಾಯ ಕೇಳಿದರೂ ಯಾರೊಬ್ಬರು ಸಹಾಯಕ್ಕೆ ಬರುವ ಸಂಭವ ಕಡಿಮೆ. ಆ ಸಂದರ್ಭದಲ್ಲಿ ಕೆಲವೊಮ್ಮೆ ಗಲಿಬಿಲಿಗೊಳ್ಳದೆ ಶಾಂತವಾಗಿ ಆಲೋಚಿಸಿದರೆ ಉತ್ತರ ಹೊಳೆಯಲೂಬಹುದು.
ಪರೀಕ್ಷೆ ಮುಗಿದ ನಂತರ ಉತ್ತರ ಸಿಕ್ಕರೂ .... ಬೇರೆಯವರು ಉತ್ತರ ಹೇಳಿದರೂ ವ್ಯರ್ಥ. ಏಕೆಂದರೆ ಅದರಿಂದ ಏನೂ ಪ್ರಯೋಜನವಿಲ್ಲ. ಅದೇ ರೀತಿ ಕೆಲವೊಂದು ಘಟನೆಯ ನಂತರ ಪರಿಹಾರ ಸಿಕ್ಕರೂ ವ್ಯರ್ಥ. ಒಂಥರಾ ಊಟಕ್ಕಿಲ್ಲದ ಉಪ್ಪಿನಕಾಯಿಯಂತೆ ವ್ಯರ್ಥ . ಪರೀಕ್ಷೆಯ ಕೊಠಡಿ ಹಾಗೂ ಪರೀಕ್ಷೆಯನ್ನು ಬದುಕಿಗೆ ಹೋಲಿಸಿಕೊಂಡರೆ ಹಲವಾರು ಧನಾತ್ಮಕ ಅಂಶಗಳು ಗೋಚರವಾಗಬಹುದು. ಅಂಥಾ ಗೋಚರ ಅಂಶಗಳನ್ನು ಗುರುತಿಸುತ್ತಾ ಬದಲಾಗೋಣ. ಈ ಧನಾತ್ಮಕ ಕಲಿಕೆಯ ಬದಲಾವಣೆಗೆ ಯಾರನ್ನೂ ಕಾಯದೆ ನಾವೇ ಬದಲಾಗೋಣ. ಬದಲಾಗೋಣವೇ ಪ್ಲೀಸ್..! ಏನಂತೀರಿ...?.
ಶಿಕ್ಷಕರು ಮತ್ತು ತರಬೇತುದಾರರು
Mob: +91 99802 23736
********************************************
