ಮಕ್ಕಳಿಗಾಗಿ ವಿಜ್ಞಾನ : ಸಂಚಿಕೆ - 82

ಮಕ್ಕಳಿಗಾಗಿ ವಿಜ್ಞಾನ : ಸಂಚಿಕೆ - 82

ಲೇಖಕರು : ದಿವಾಕರ ಶೆಟ್ಟಿ ಎಚ್

ನಿವೃತ್ತ ಪ್ರವಾಚಕರು

ಸರಕಾರಿ ಶಿಕ್ಷಕ ಶಿಕ್ಷಣ ಮಹಾವಿದ್ಯಾಲಯ

ಮಂಗಳೂರು, ದಕ್ಷಿಣ ಕನ್ನಡ ಜಿಲ್ಲೆ

Mob: 9448571203

                  

ಪ್ರೀತಿಯ ಮಕ್ಕಳೇ.. ನಾವು ಊಟಕ್ಕೆ ಹೋದಾಗ ಎಲ್ಲ ಅಡುಗೆಗಳನ್ನೂ ಬಡಿಸುತ್ತಾರೆ. ಆದರೆ ನಾವು ತಿನ್ನುವುದು ನಾವು ಇಷ್ಟಪಡುವುದನ್ನು ಮತ್ತು ಅಗತ್ಯವಾದುದನ್ನು. ಉಳಿದವನ್ನು ಹಾಗೇ ಬಿಟ್ಟು ಬಿಡುತ್ತೇವೆ. ಸಸ್ಯಗಳು ಮಾಡುತ್ತಿರುವುದು ಕೂಡಾ ಅದನ್ನೇ. ಅವುಗಳ ಮೇಲೆ ಬೆಳಕು ತನ್ನ ಏಳು ಬಣ್ಣಗಳನ್ನು ತಂದು ಸುರಿಯುತ್ತದೆ. ಬೆಳಕು ಆರು ಬಣ್ಣಗಳನ್ನು ಬೇರೆಬೇರೆ ಪ್ರಮಾಣದಲ್ಲಿ ಹೀರಿಕೊಳ್ಳುತ್ತದೆ. ಆದರೆ ಅದು ಹಸುರನ್ನ ಬಳಸಿಕೊಳ್ಳದು. ಆದ್ದರಿಂದ ಅದು ಹಸಿರು ತರಂಗಾಂತರವನ್ನು ಹಿಂದಕ್ಕೆ ಕಳುಹಿಸುತ್ತದೆ ಅಂದರೆ ಪ್ರತಿಫಲಿಸುತ್ತದೆ. ಅಂದರೆ ಈ ಹಸಿರು ಸಸ್ಯಗಳ ವಿಸರ್ಜನೆ. ಆದರೆ ಇದು ಮಾನವನ ಕಣ್ಣಿಗೆ ಆಹ್ಲಾದಕರ ಬಣ್ಣ (miracle colour). ಹಸುರು ಬಣ್ಣ ಕಣ್ಣಿನ ಕಣ್ಣಿಗೆ ತುಂಬಾ ಸ್ನೇಹಿ ಅಂದರೆ ಕೆಲಸದ ನಡುವೆ ದೂರದ ಹಸಿರು ಪ್ರಕೃತಿಯನ್ನು ವೀಕ್ಷಿಸುವುದು ಕಣ್ಣಿನ ಒತ್ತಡವನ್ನು ಕಡಿಮೆ ಮಾಡುವುದು ಮಾತ್ರವಲ್ಲ ಕಣ್ಣಿನ ಕಾರ್ಯಕ್ಷಮತೆಯನ್ನು ಹೆಚ್ಚಿಸುತ್ತದೆ. ಇದೂ ಆಮ್ಲಜನಕದ ಹಾಗೆ ಸಸ್ಯ ವರ್ಜಿತ ಅಂಶ ಮಾನವನಿಗೆ ಅವಶ್ಯಕ.

ಹಾಗೆ ಇನ್ನೊಂದು ಬಣ್ಣ ನಿಮಗೆ ಪರಿಚಿತವಾದುದು. ನೀವು ಚಿತ್ರ ಬರೆಯುತ್ತೀರಿ ಆಗ ಆಗಸ ಇದ್ದರೆ ಅದಕ್ಕೆ ನೀಲಿ ಬಣ್ಣ. ಆಳವಾದ ಕೆರೆ ಭೂಪಟದಲ್ಲಿ ಸಮುದ್ರ ತೋರಿಸಲೂ ನೀವು ಕಲಸುವುದು ನೀಲಿಯೇ. ಯಾಕೆ ಆಗಸ ಅಥವಾ ಆಳ ಸಮುದ್ರ ನೀಲಿಯಾಗಿರುತ್ತವೆ.? ಇದಕ್ಕೆ ಬೆಳಕಿನ ಚದುರುವಿಕೆಯೇ ಕಾರಣ. ಬೆಳಕು ವಾತಾವರಣವನ್ನು ಪ್ರವೇಶಿಸುತ್ತಿದ್ದಂತೆ ಗಾಳಿಯ ಕಣಗಳು ಮತ್ತು ಗಾಳಿಯಲ್ಲಿರುವ ಇತರ ಕಣಗಳಿಗೆ ಇದು ಒದೆಯಲು ಶುರು ಮಾಡುತ್ತದೆ. ಇದರಿಂದ ಅವುಗಳಿಗೆ ಏನೂ ಆಗುವುದಿಲ್ಲ ಏಕೆಂದರೆ ಗೋಡೆಗೆ ಬಡಿಯುವ ಚೆಂಡು ತಾನೆ ನೆಗೆಯಬೇಕಾಗುತ್ತದೆ ಹೊರತು ಗೋಡೆ ಅಲ್ಲ. ಹೀಗೆ ಬೆಳಕು ಚದುರುತ್ತದೆ. ನಮಗೆ ಸರಿಯಾಗಿ ಗೊತ್ತಿದೆ ಬಿಳಿಯ ಬೆಳಕು ಒಂದೇ ಬೆಳಕಲ್ಲ ಅದರಲ್ಲಿ ಬಹಳ ತರಂಗಾಂತರಗಳಿವೆ. ಇವುಗಳಲ್ಲಿ ಹೆಚ್ಚು ತರಂಗಾಂತರವನ್ನು ಹೊಂದಿರುವ ಕೆಂಪು ಮತ್ತು ಕಿತ್ತಳೆ ಬೆಳಕು ಕಡಿಮೆ ಚದುರುತ್ತವೆ ಮತ್ತು ಹೆಚ್ಚಿನ ತರಂಗಾಂತರದ‌ ನೀಲಿ, ಹಸಿರು, ನೇರಳೆಗಳು ಹೆಚ್ಚು ಚದುರುತ್ತವೆ. ಇದರಲ್ಲಿ ನೇರಳೆ ಅತಿ ಹೆಚ್ಚು ಚದುರುತ್ತದಾದರೂ ಅದು ಕಣ್ಣು ಸ್ನೇಹಿ ಬಣ್ಣ ಅಲ್ಲ ಮತ್ತು ನೀಲಿಯ ವರ್ಣ ಪಟಲ ಇದ್ದುದರಲ್ಲಿ ದೊಡ್ಡದು. ಆದ್ದರಿಂದ ಹೆಚ್ಚು ಚದುರುವುದು ನೀಲಿಯೇ. ಆದ್ದರಿಂದ ಆಗಸ ನೀಲಿಯಾಗಿಯೇ ಕಾಣುವುದು. ಈ ಚದುರುವಿಕೆಗೆ ಒಂದು ಹೆಸರಿರಬೇಕಲ್ಲ, ಏನೂ ಇಲ್ಲ ಅಂದರೆ ಇದನ್ನು ಮೊದಲ ಬಾರಿಗೆ ವ್ಯವಸ್ಥಿತವಾಗಿ ವಿವರಿಸಿದವರ ಹೆಸರನ್ನಾದರೂ ಇಟ್ಟು ಬಿಡೋಣ ಅಂದು ಕೊಂಡಿದ್ದೀರಾ? ಸರಿ. ಇದನ್ನು ಮೊದಲು ವಿವರಿಸಿದವನು John William Stut, 3rd Baron Rayliegh. ಆದ್ದರಿಂದ ಇದನ್ನು Rayliegh scattering ಎಂದು ಕರೆದು ಬಿಡೋಣ.

ಇನ್ನು ಸಮುದ್ರದ ನೀಲಿ ಬಣ್ಣಕ್ಕೆ ಬರೋಣ. ನೀರು ಒಂದು ಆಯ್ದ ಸೋಸಕದಂತೆ ವರ್ತಿಸುತ್ತದೆ. (selective filter). ಅದು ಹೆಚ್ಚು ತರಂಗಾಂತರದ ಕೆಂಪು ಮತ್ತು ಕಿತ್ತಳೆ ಬಣ್ಣಗಳನ್ನು ಸುಲಭವಾಗಿ ಹೀರುತ್ತವೆ. ಆದರೆ ಕಡಿಮೆ ತರಂಗಾಂತರದ ಬೆಳಕು ಚದುರಿಸಲ್ಪಡುತ್ತದೆ. ಮಾಮೂಲಿಯಂತೆ ನೀಲಿ ಹೆಚ್ಚು ಚದುರುವುದರಿಂದ ನೇರಳೆ ಪ್ರಧಾನವಾಗಿಲ್ಲದೇ ಇರುವುದರಿಂದ ಸಮುದ್ರ, ಆಳವಾದ ನೀರಿನ ಮೂಲ ಎಂದಾಕ್ಷಣ ನೀವು ನೀಲಿ ಬಣ್ಣವನ್ನೇ ಬಳಿಯುತ್ತೀರಿ ಏಕೆಂದರೆ ಅದು ಹಾಗೆಯೇ ಕಾಣಿಸುತ್ತದೆ. ಆಳಕ್ಕೆ ಹೋದ ಹಾಗೆ ಬೆಳಕು ಕ್ಷೀಣವಾಗುತ್ತ ಸಾಗುತ್ತದೆ. ಆದ್ದರಿಂದ ಆಳ ಸಮುದ್ರ ಜೀವಿಗಳು ತಮ್ಮ ಬೆಳಕನ್ನು ತಾವೇ ಉತ್ಪಾದಿಸಿಕೊಳ್ಳುತ್ತವೆ ಅಥವಾ ಕುರುಡಾಗಿರುತ್ತವೆ. ಬಳಕೆಯಾಗದ ಅಂಗ ಏಕಾದರೂ ಹೊಂದಬೇಕು ಅಲ್ಲವೇ?

ಈ ಕೆಂಪು ಬೆಳಕು ದ್ಯುತಿಸಂಶ್ಲೇಷಣೆ ಕ್ರಿಯೆಗೆ ತುಂಬಾ ಅವಶ್ಯಕ ಎನ್ನುವುದು ನಮಗೆ ಗೊತ್ತು. ಹಾಗಾದರೆ ಆಳ ಸಮುದ್ರದಲ್ಲಿರುವ ಸಸ್ಯಗಳು ಹೇಗೆ ಆಹಾರ ತಯಾರಿಸುತ್ತವೆ ಮತ್ತು ಅಂತಹ ಸಸ್ಯಗಳೇನಾದರೂ ಇದ್ದಾವೆಯೇ ಎಂಬ ಅನುಮಾನ ಮೂಡಿರಬಹುದು. ಹೌದು ಸಮುದ್ರದ ಆಳದಲ್ಲಿ ಕೆಂಪು ಪಾಚಿಗಳು (red algae/Rhodophyta) ಗಳಿವೆಯಲ್ಲ ಅವುಗಳಲ್ಲಿ ಫೈಕೋ ಎರಿತ್ರಿನ್ ಎಂಬ ವರ್ಣಕ (phycoerithrin pigment) ಇರುವುದರಿಂದ ಅದು ಆಳ ಸಮುದ್ರದೊಳಗೆ ತೂರಿ ಬರುವ ಚೂರೇ ಚೂರು ಕೆಂಪು ಬಣ್ಣವನ್ನು ಪ್ರತಿಫಲಿಸಿ ಕೆಂಪಾಗಿ ಕಾಣುವುದರಿಂದ ಈ ಹೆಸರು. ಇವುಗಳಲ್ಲಿ ಕ್ಲೋರೊಫಿಲ್ a ಮತ್ತು ಕ್ಲೋರೊಫಿಲ್ d ಇವೆ. ಈ ಕ್ಲೋರೊಫಿಲ್ d ನೀಲಿ ಮತ್ತು ಹಸಿರು ವ್ಯಾಪ್ತಿಯಲ್ಲಿ ಶಕ್ತಿಯನ್ನು ಹೀರಿಕೊಂಡು ಕ್ಲೋರೊಫಿಲ್ a ಗೆ ಒದಗಿಸುತ್ತವೆ ಮತ್ತು ಕ್ಲೋರೊಫಿಲ್ a ಆಹಾರ ತಯಾರಿಸುತ್ತವೆ. ಮನೆಯಲ್ಲಿ ಗ್ಯಾಸ್ ಮುಗಿದಿದೆ ಎಂದರೆ ಅಪ್ಪ ಅಮ್ಮನಿಗೆ ಸೌದೆ ತಂದುಕೊಟ್ಟು ಅಡುಗೆಗೆ ಸಹಾಯ ಮಾಡಿದ ಹಾಗೆ. 

ಪ್ರಕೃತಿ ಒಬ್ಬ ಅದ್ಭುತ ವಿನ್ಯಾಸಕಾರ ಎಂಬ ನನ್ನದೇ ಹೇಳಿಕೆಯನ್ನು ಪುನರುಚ್ಛರಿಸಿದರೆ ನಿಮಗೆ ಕಿರಿಕಿರಿಯಾಗುವುದಿಲ್ಲ ತಾನೇ?

.................................... ದಿವಾಕರ ಶೆಟ್ಟಿ ಎಚ್

ನಿವೃತ್ತ ಪ್ರವಾಚಕರು

ಸರಕಾರಿ ಶಿಕ್ಷಕ ಶಿಕ್ಷಣ ಮಹಾವಿದ್ಯಾಲಯ

ಮಂಗಳೂರು, ದಕ್ಷಿಣ ಕನ್ನಡ ಜಿಲ್ಲೆ

Mob: 9448571203

********************************************