ಜೀವನ ಸಂಭ್ರಮ : ಸಂಚಿಕೆ - 119
Monday, January 8, 2024
Edit
ಲೇಖಕರು : ಎಂ.ಪಿ. ಜ್ಞಾನೇಶ್
ಶಿಕ್ಷಣಾಧಿಕಾರಿ
ಪ್ರಧಾನ ಮಂತ್ರಿ ಪೋಷಣ್ ಶಕ್ತಿ ನಿರ್ಮಾಣ
(ಮಧ್ಯಾಹ್ನ ಉಪಹಾರ ಯೋಜನೆ)
ಜಿಲ್ಲಾ ಪಂಚಾಯತ್ ಮಂಗಳೂರು
ದಕ್ಷಿಣ ಕನ್ನಡ ಜಿಲ್ಲೆ
ಇಚ್ಛೆ ಇಲ್ಲದಿದ್ದರೆ ಜೀವನ ನಡೆಯುವುದು ಹೇಗೆ.? ಏನಾದರೂ ಸಾಧನೆ ಮಾಡಬೇಕಾದರೆ ಇಚ್ಛೆ ಬೇಕು. ಇಚ್ಛೆ ಎಂದರೆ ಬಲಾಢ್ಯವಾದ ಪ್ರೀತಿ. ಆ ಇಚ್ಛೆ ಇದ್ದರೆ ಏನಾದರೂ ಮಾಡಿಸುತ್ತದೆ. ಕುಳಿತುಕೊಳ್ಳುವಂತೆ ಮಾಡುತ್ತದೆ. ನಡೆದಾಡುವಂತೆ ಮಾಡುತ್ತದೆ. ಕೆಲಸ ಮಾಡುವಂತೆ ಮಾಡುತ್ತದೆ. ತ್ಯಾಗ ಮಾಡಿಸುತ್ತದೆ. ಮನೆ ಕಟ್ಟಿಸುತ್ತದೆ. ಅದೇ ಇಚ್ಛೆ ಮನೆ ಬಿಡಿಸುತ್ತದೆ. ಅಂತಹ ಬಯಕೆಯೇ ಇಚ್ಛೆ.
ಬುದ್ಧ ಏಕೆ ಮನೆ ಬಿಟ್ಟ?. ಮಹಾವೀರ ಏಕೆ ಮನೆ ಬಿಟ್ಟನು? ಇಚ್ಛೆ ಆ ರೀತಿ ಮಾಡಿಸುತ್ತದೆ. ನಮಗೆಲ್ಲರಿಗೂ ಚೆನ್ನಾಗಿರಬೇಕೆಂಬ ಇಚ್ಛೆ. ಕನಸು ಬೀಳುತ್ತದೆ, ಆ ಕನಸೇ ಇಚ್ಛೆ. ಆ ಬಯಕೆ ದುಡಿಯಲು ಹೇಳುತ್ತಿದೆ. ಕಷ್ಟಪಡಲು ಹೇಳುತ್ತದೆ. ಎಂತಹ ಕಷ್ಟ ಬಂದರೂ ಎದುರಿಸುವಂತೆ ಹೇಳುತ್ತದೆ. ಅಂತ ಬಯಕೆಯೇ ಇಚ್ಛೆ.
ಶತಮಾನಗಳ ಹಿಂದೆ ಮಿಹಿರಸೇನ್ ಎನ್ನುವ ವ್ಯಕ್ತಿ ಇದ್ದನು. ಈತ ದೊಡ್ಡ ಈಜುಗಾರ ಮತ್ತು ವಕೀಲ. ಬಾಲ್ಯದಲ್ಲಿ ತಾಯಿಯೊಂದಿಗೆ ಬಟ್ಟೆ ತೊಳೆಯಲು ಕೆರೆಗೆ ಹೋಗಿದ್ದನು. ತಾಯಿ ಬಟ್ಟೆ ತೊಳೆಯುತ್ತಿದ್ದಳು. ಈತ ಇನ್ನು ಚಿಕ್ಕ ಹುಡುಗ. ನಾನು ನೀರಿನಲ್ಲಿ ಈಜಬೇಕು ಎಂದು ತಾಯಿ ಹತ್ತಿರ ಕೇಳಿದ. ತಾಯಿ ಹೇಳಿದಳು, "ಮೊದಲು ಈಜುಕಲಿ, ಈ ಕೆರೆಯಲ್ಲ ದೊಡ್ಡ ಸಾಗರವನ್ನು ಈಜಬಲ್ಲೆ , ಆ ಸಾಮರ್ಥ್ಯ ನಿನಗೆ ಇದೆ, ಎಂದಳು. ನಾವಾದರೆ ಅದು ಎರಡು ಅಡಿ ಆಳವಿದೆ. ಹೋಗಬೇಡ ಬಟ್ಟೆ ಒದ್ದೆಯಾಗುತ್ತದೆ. ಹೋಗಬೇಡ ನೆಗಡಿಯಾಗುತ್ತದೆ. ಹೋಗಬೇಡ ಮುಳುಗಿದರೆ ಕಷ್ಟ. ಹೋಗಬೇಡ ಎನ್ನುತ್ತಿದ್ದೆವು. ಆದರೆ ಮಿಹಿರಾಸೇನನ ತಾಯಿ ಆ ಮಗುವಿನಲ್ಲಿ ಎಂಥ ಭಾವ ತುಂಬಿದಳು. ಕೆರೆ, ಕೊಳ್ಳ, ಹಳ್ಳ, ನದಿ, ಯಾರು ಬೇಕಾದರೂ ಏರುತ್ತಾರೆ. ಕೆಲವೇ ಕೆಲವರು ಸಾಧನೆ ಮಾಡುತ್ತಾರಲ್ಲ ಹಾಗೆ ನೀನು ಸಾಧನೆ ಮಾಡಬೇಕು ಎಂದಳು. ಆಗಿನ್ನು ಈಜು ಕಲಿತಿರಲಿಲ್ಲ. ಆದರೆ ರಾತ್ರಿ ಮಲಗಿದ್ದಾಗ ಒಂದು ಕನಸು ಬೀಳುತ್ತದೆ, ಸಮುದ್ರದಲ್ಲಿ ಈಜಿದಂತೆ. ಆ ಕನಸು ಆತನ ಇಚ್ಛೆಯಾಯಿತು. ಆ ಇಚ್ಛೆ ಆತನನ್ನು ದೊಡ್ಡ ಈಜುಗರನ್ನಾಗಿ ಮಾಡುವಂತೆ ಪ್ರೇರೇಪಿಸಿತು. ಈಜು ಕಲಿತು, ತರಬೇತಿ ಹೊಂದಿ, ಭಾರತದಿಂದ ಶ್ರೀಲಂಕಕ್ಕೆ, ಹಿಂದೂ ಮಹಾಸಾಗರ ಈಜಿದನು. ಸಾಗರ ಎಂದರೆ ಕಿಲೋ ಮೀಟರ್ ಆಳ. ಸುತ್ತಮುತ್ತ ನೀರು. ಭಯಂಕರ ತೆರೆ. ಭಯಾನಕ ಜಲಚರಗಳು. ಇವುಗಳ ಮಧ್ಯೆ ಈಜುತ್ತಿದ್ದನು. ಈ ರೀತಿ ಸಾಧನೆಗೆ ಕಾರಣ ಇಚ್ಛೆ.
ಮಕ್ಕಳೇ ಇಚ್ಚೆಯಲ್ಲಿ ಎರಡು ವಿಧ. ಒಂದು ವಿಧದ ಇಚ್ಛೆ ಸ್ವರ್ಗ ನಿರ್ಮಾಣ ಮಾಡಿದರೆ, ಮತ್ತೊಂದು ವಿಧದ ಇಚ್ಛೆ ನರಕ ನಿರ್ಮಾಣ ಮಾಡುತ್ತದೆ. ಹೂವುಗಳ ಕಿತ್ತು ತಿಪ್ಪೆಯಲ್ಲಿ ಹಾಕಿದರೆ ಅದು ವಿನಾಶಕ ಇಚ್ಛೆ. ಆ ಹೂಗಳಲ್ಲಿ ಸುಂದರವಾಗಿರುವುದನ್ನು ಆಯ್ದು ಹೊಂದಿಸಿ ಸುಂದರ ಜೋಡಣೆ ಮಾಡಿದರೆ ಅದು ಸ್ವರ್ಗ. ಮಕ್ಕಳೇ ನಮ್ಮಲ್ಲಿ ಸ್ವರ್ಗ ನಿರ್ಮಾಣ ಮಾಡುವ ಇಚ್ಚೆ ಇರಲಿ, ಅಲ್ಲವೇ ಮಕ್ಕಳೇ
ಶಿಕ್ಷಣಾಧಿಕಾರಿ
ಪ್ರಧಾನ ಮಂತ್ರಿ ಪೋಷಣ್ ಶಕ್ತಿ ನಿರ್ಮಾಣ
(ಮಧ್ಯಾಹ್ನ ಉಪಹಾರ ಯೋಜನೆ)
ಜಿಲ್ಲಾ ಪಂಚಾಯತ್ ಮಂಗಳೂರು
ದಕ್ಷಿಣ ಕನ್ನಡ ಜಿಲ್ಲೆ
*******************************************
