ರಜೆಯನ್ನು ಶಾಲೆಯಲ್ಲೇ ಮುಂದುವರಿಸೋಣ ಬನ್ನಿ.....
Sunday, May 15, 2022
Edit
ವಿಜ್ಞಾನ ಶಿಕ್ಷಕ
ಸರಕಾರಿ ಪ್ರೌಢಶಾಲೆ, ಸಿದ್ಧಾಪುರ
ಕುಂದಾಪುರ ತಾಲೂಕು , ಉಡುಪಿ ಜಿಲ್ಲೆ
ಶಾಲೆ ಇಲ್ಲದಿರುವುದೇ ರಜೆಯೇ....? ಕಲಿಕೆ ಇಲ್ಲದಿರುವುದು ರಜೆಯೇ......? ಅಥವಾ ನಮಗಿಷ್ಟವಾದ ಚಟುವಟಿಕೆಗಳಲ್ಲಿ ತೊಡಗಿಕೊಳ್ಳುವುದು ರಜೆಯೇ.....?
ಕಲಿಕೆ ಇಲ್ಲದಿರುವ ಯಾವ ಗಳಿಗೆಯೂ ಇರಲಾರದು. ನಾವು ಕಲಿಯುತ್ತಲೇ ಇರುತ್ತೇವೆ. ಶಾಲೆ ಸೇರದ ಮಗುವೂ ಕಲಿಯುತ್ತದೆ. ಶಾಲೆಗೆ ಬರುವ ಮುಂಚೆಯೇ ನಾವೆಲ್ಲ ಎಷ್ಟೊಂದು ಕಲಿತಿರಲಿಲ್ಲ....?! ನಮ್ಮ ಸಂಬಂಧಿಗಳನ್ನು ಗುರುತಿಸಲು ನಾವು ಕಲಿತಿದ್ದೆವು, ಬಣ್ಣಗಳನ್ನು ಪ್ರತ್ಯೇಕಿಸಬಲ್ಲವಾಗಿದ್ದೆವು, ಎಷ್ಟೋ ಪ್ರಾಣಿಗಳ ಹೆಸರು ನಮಗೆ ಶಾಲೆಗೆ ಬರುವ ಮೊದಲೇ ಗೊತ್ತಿತ್ತು. ನಾವು ಮಾತನಾಡುವುದನ್ನು ಕಲಿತಿದ್ದು ಶಾಲೆಗೆ ಬರುವ ಮುನ್ನವೇ ಅಲ್ಲವೇ.....? ಕೂಡಿಸುವುದು, ಕಳೆಯುವುದು, ಗಾತ್ರ , ಆಕಾರ ಮುಂತಾದ ಗಣಿತ ಪರಿಕಲ್ಪನೆಗಳನ್ನು ನಮಗೆ ಯಾರು ಕಲಿಸಿದರು....?
ನಾವು ಕಲಿತೆವು. ನಾವು ಆಡುತ್ತಾ ಕಲಿತೆವು. ಒಡನಾಡುತ್ತಾ ಕಲಿತೆವು. ಒಬ್ಬರಿಗೊಬ್ಬರು ಸಹಾಯವಾಗುತ್ತಾ ಕಲಿತೆವು. ಕಲಿಯುತ್ತಿದ್ದೇವೆಂದು ಅರಿಯದೇ ಕಲಿತೆವು. ಕ್ರಿಕೆಟ್, ಕಬಡ್ಡಿ, ಕಳ್ಳ- ಪೋಲಿಸ್ ಯಾವುದೇ ಆಟವಿರಲಿ, ಅದರಲ್ಲಿ ಎಷ್ಟೊಂದು ನಿಯಮಗಳಿರುತ್ತವೆ. ಆ ಎಲ್ಲ ನಿಯಮಗಳನ್ನು ತರಗತಿ ಪಾಠಗಳಂತೆ ಕಲಿತು, ನಂತರವೇ ಆಡುವುದಾಗಿದ್ದರೆ ನಾವು ಅನೇಕ ಆಟಗಳನ್ನು ಆಡುತ್ತಲೇ ಇರಲಿಲ್ಲ. ಆದರೆ, ಆಟವಾಡುವುದು ಮತ್ತು ಆಟದ ನಿಯಮಗಳನ್ನು ಕಲಿಯುವುದು ನಮಗೆ ಬೇರೆ ಬೇರೆ ಎನಿಸಿರಲಿಲ್ಲ. ನಾವು ಯಾವಾಗ ಆಟದ ನಿಯಮಗಳನ್ನು ಕಲಿತೆವೆಂಬುದು ನಮ್ಮ ಅರಿವಿಗೆ ಬಂದೇ ಇರಲಿಲ್ಲ. ಹೌದು, ಶಾಲೆಯ ಹೊರಗೂ ನಾವು ಕಲಿಯಬಲ್ಲೆವು ಮತ್ತು ಕಲಿಯುವುದು ಖುಷಿಯ ಚಟುವಟಿಕೆಯೂ ಆಗಬಹುದು. ಶಾಲೆಯಲ್ಲೇ ಹೀಗೆ ಕಲಿಯುವುದಾದರೆ ಹೇಗಿರಬಹುದು.....?
ಈ ಬಾರಿ ಶಾಲೆ ಶುರುವಾಗುವಾಗ ನಿಮಗೊಂದು ಖುಷಿಯ ಸುದ್ದಿ ಕಾದಿದೆ. ಈ ಬಾರಿ ಶಾಲೆ ಆರಂಭವಾಗುವುದೆಂದರೆ, ರಜೆಯ ಮುಂದುವರಿಕೆಯೇ ಆಗಿರುತ್ತದೆ. ರಜೆಯಂತೆ ಶಾಲೆಯಲ್ಲೂ ಖುಷಿಯಾಗಿರಬಹುದು, ನಿಮ್ಮ ಸಹಪಾಠಿಗಳೊಂದಿಗೆ ಒಡನಾಡುತ್ತಾ ಕಲಿಯಬಹುದು. ಕಲಿಯುವುದು ಮತ್ತು ಖುಷಿಯಾಗಿರುವುದು ಬೇರೆ ಬೇರೆ ಆಗದಂತೆ ಶಿಕ್ಷಕರೂ ನಿಮ್ಮೊಡನೆ ಸೇರಿಕೊಳ್ಳುತ್ತಾರೆ.
ಹೌದು.
ನೀವೆಣಿಸುವುದು ಸರಿಯಾಗಿದೆ. ಆಗ ಶಾಲೆಯಿದ್ದರೂ ರಜೆಯಂತಾಗಬಹುದು. ಕಲಿಕೆಯು ಆಟದಂತಾಗಬಹುದು.
ಬನ್ನಿ, ಆಟವಾಡೋಣ....!
ವಿಜ್ಞಾನ ಶಿಕ್ಷಕ
ಸರಕಾರಿ ಪ್ರೌಢಶಾಲೆ, ಸಿದ್ಧಾಪುರ
ಕುಂದಾಪುರ ತಾಲೂಕು , ಉಡುಪಿ ಜಿಲ್ಲೆ
******************************************
